3 mobil operatoru bazar paylarına uyğun sıralayıb dijital marketinq fəaliyyətlərinə nəzər salaq.
Azercell
Bazarda lider operator olsa da, rəqəmsal marketinqdə həmişə rəqiblərindən geri qalan Azercell yaddaqalan bir şey etmədi.
Sosial mediada standart fotopostların keyfiyyəti stabil yaxşı səviyyədə qalır. 2018-ci ilin son rübündən etibarən mütəmadi endirim kampaniyalarının olması səhifəni abunəçilərə daha maraqlı edib. Lakin qeyri-standart formatlar (3D post, 3D video, poll, maraqlı konkurslar və s.) demək olar ki, istifadə olunmur. Azercell-də Brend, Satış və PR komandalarının aktivliyi, müxtəlif layihələri olur və onlar öz əksini sosial mediada tapır. Lakin sırf dijital marketinq baxımından formalaşmış komandanın olmaması öz sözünü deyir.
Bəxtiyar Hacıyev ilə qalmaqallı insident 2017-ci ilin dekabrında olsa da, onun davamı 2018-də də davam etdi. Ümumiyyətlə, sosial mediada Azercell haqqında neqativ şərhlər, etiketləmələr, brendin səviyyəsini aşağı salmağa yönəlik cəhdlər çox oldu.
Azercell də Bakcell kimi reklamlarda ən sadə, basic alətlərdən istifadə edir. Facebook üçün custom audience yaradılmır. Bunun nəticəsində də fakturalı Azercell abonentinə Gənc Ol reklamını göstərmək, böyük paket istifadəçisinə (məs, 15 AZN abunəçisinə) 3 manatlıq paketin reklamı kimi hallar yaranır (buna down-sell demək olar). Bu sosial media büdcəsinin qeyri-effektiv xərcinə gətirib çıxarır.
Qısa müddət paid search reklamlarından istifadə olunsa da, sonradan Google-da axtarış reklamları da dayandırıldı. Əvvəllər xəbər saytlarında xeyli reklam vermiş Azercell displey mediada da aktivliyini minimallaşdırıb.
Müasir trendlərə tam cavab verməsə də, Azercell-in rəsmi veb-saytı yaxşı idi. Açılma sürətinin tez olması, data landing page-lərin olması, mobil responsivlik yaxşı səviyyədə idi. Saytda ən böyük çətinlik UX-in pis olması idi.
Bakcell
2018-ci ilin əsas uğuru kimi Mənim Bakcellim tətbiqini göstərmək olar. Mobil operatorlar arasında yeganə olaraq Bakcell-də belə tətbiq oldu ki, bu da müştəri məmnuniyyətinə çox böyük təsir etdi. Tətbiqin endirmə sayı, keyfiyyəti, üzərində aparılan optimzasiya da yaxşı səviyyədədir. Lakin mobil tətbiqi relevant platformalarda reklam etmək əvəzinə metro, çöl reklamı və s. seçildi. Düzü, mobile install ads olan yerdə, veb-banner yerləşdirilən saytların mobil versiyasında tətbiqə yönələn reklam yerləşdirmək imkanı ola-ola niyə görə OOH və metroya bu qədər diqqət ayrılması sual yaradır.
Bakell-in daha bir uğuru müştəri xidmətlərini rəqəmsallaşdırmaq ilə bağlıdır.
Əvvəllər sosial media üzərindən digital CRM xidmətini yalnız Nar təklif edirdi. Abonent nömrə ilə bağlı əməliyyatlarını, bütün problemlərini rahat şəkildə Nar-ın rəqəmsal kanallarına göndərməklə operativ həll edə bilirdi. Daha çağrı mərkəzinə zəng, uzun-uzadı yönləndirmələr və s. olmurdu. Və bu da Nar-ın bazarda ən böyük üstünlüklərindən biri idi. Artıq Bakcell də Nar-ın analoji xidmətini tətbiq etməyə başladı. Eyni həcmdə və keyfiyyətdə olmasa da, social CRM inkişaf edir.
Axtarış reklamları, SEO, veb-analitika və s. barədə yazmayacam. Sırf bu iş üzrə ixtisaslaşan kadrların Bakcell-də olmaması öz sözünü deyir. Ümumiyyətlə, ölkəmizdə dijital mediaya peşəkar yanaşma olmayana qədər vəziyyət də ürəkaçan olmayacaq.
Nar
Nar-da işləsəm də, obyektiv olaraq qiymət verməyə çalışacam. Bu il həm böyük uğurlar, həm də böyük itkilər ili oldu desəm, yanılmaram.
İtkilər oldu, çünki dijital marketinq üçün etmək mümkün olan çox-çox şeylər etmədik. Daha doğrusu, etmək imkanımız olmadı. Ürək istərdi ki, biri-birindən maraqlı işlərlə istədiyimizi edək. Problemlər az olmadı: büdcə azlığı, mobil tətbiqin olmaması, UX/Uİ ilə problemlər, veb-saytda boşluqlar, konversiya ölçümünün həyata keçirilməməsi və s.
Digər tərəfdən, istədiyimiz qədər edə bilməsək də, amma xeyli işlər də gördük.
Fəxrlə deyə bilərəm ki, maksimum dərəcədə gamification istifadə etdik. Ana dili, Məktəb illəri, Göyçaya səfər, Nar-ı nə qədər yaxşı tanıyırsan? kimi viktorinalar xeyli marağa səbəb oldu. Sadəcə sosial mediada konkurs edib random qalibi seçmək yox, edutainment taktikalarını icra etməyi üstün tutduq.
Nar-ın sosial media postları uzun illər nümunəvi olub və Azərbaycanda ən yaxşılar siyahısında olub. 2018-ci ildə elə böyük irəliləyişlər olmasa da, amma ən azından əvvəlki keyfiyyət qorunub saxlanıldı. Xüsusilə video-postlar, 3D video-postlar, müxtəlif konkurslar və s. tətbiq etməklə fərqlənməyə çalışdıq. Partnyor agentlik kimi Safaroff ilə birgə görülən işləri ümumilikdə yaxşı qiymətləndirirəm.
Veb-sayt 2 dəfə yüngülvari yeniləndi. Ümumiyyətlə, 2018-ci ildə Nar Refreshment layihəsi çərçivəsində brendini yenilədi. Əvvəlki “Nar Garden” konsepsiyasından çıxıb müştərilərə daha yaxın, daha flexible olmağı hədəfləyən strategiya müəyyənləşdirildi.
Əvvəllər Nar video-reklamlarla diqqəti cəlb etmirdi, lakin 2018-ci ildə xeyli sayda video-reklamlar istehsal olundu. Düzdür, bu daha çox Brend və Reklam, PR komandalarının sayəsində oldu, lakin dijital marketinq komandası onlara xeyli dəstək oldu.
Refreshment çərçivəsində veb-sayt və sosial media-da səs tonu dəyişildi. Xeyli problemlər yaşansa da, sonda nəticə ürəkaçan oldu.
Display mediada büdcə artırıldı, saytlarda reklamların formatları, tezliyi və s. optimizasiya edildi. Ən çox işlər elə veb-analitika, SEO, display media üçün reklamlar sahəsində göründü. Daha yaxşı targetinq imkanları, custom audience-lər, CRM və digital reklamları uyğuunlaşdırmaq və s. üçün xeyli iş görüldü (tam istədiyimiz kimi edə bilməsək də)
Qısaca
Heç bir operator dijital marketinqi mükəmməl şəkildə həyata keçirə bilmədi. Bunun müxtəlif obyektiv səbəbləri var. Ən əsas səbəb təbii ki, bürokratiya, şirkətdaxili prosedurlar və s.
Ortalama müqayisə etsək isə, Nar xeyli öndə olub. Bakcell onu izləyib. Azercell ən geridə olsa da, aradakı fərqi götürmək o qədər də çətin deyil.
