Fuadın Bakıda problemi varıydı, korrupsiyayla bağlı işi çıxmışdı üzə. Məcbur olub işdən çıxmışdı. Elə arvadı Samirə də qonşularla yola getmirdi, hamıyla dalaşmışdı.
Nə qohum-qardaşı, nə dostları – heç kimi görmək istəməyən Fuadgil fərqli bir şey etmişdilər. Bakıda hər şeyi satıb rayonların birində kənddə ev aldılar.
Şəhərdən gəlmiş bu adamlara kənddəkilərin reaksiyası heç də yaxşı deyildi. Dırnağı manikürlü Samirənin, kəndə gələn kimi evinə internet çəkdirmək istəyən Fuadın kənddə necə baş çıxaracağını kənddəkilər qeybət edirdilər.
2 ildən sonra Fuadın həyətində xeyli hinduşka vardı. Həyətində ancaq toyuq-cücə saxlayan kənd sakinlərindən fərqli olaraq Fuadgil söhbəti tutmuşdular ki, hinduşka saxlamaq daha sərfəlidir. Bulağın yanı tərəfdə 30 sot torpaq almışdılar, içində arı saxlamaqdan tutmuş qarğıdalıya qədər hər şey əkirdilər.
Təzə maşın almış Fuadı da, Samirəni də kənddə heç kimin gözü götürmürdü, bəyənmirdilər şəhərdən gəlmiş bu adamları. Nə toya gəlirlər, nə söhbət edirlər, elə bütün günü bağda nəsə iş görən bu şəhər adamlarını çox vaxt dindirmirdilər.
Kənddəki bərbərxanada işləyən Veyis bir gün Fuaddan soruşdu ki, “maşını neçəyə götürmüsən? Əmim oğlu da Bakıda bundan alıb kreditə”. Söz-söhbətədn sonra maraqlandı ki, “nə yaxşı maşını nağd aldın? Pulu hardan qazanırsan?”
Fuad da zarafatla, amma ciddi üzlə dedi ki, “rayon mərkəzində futbol oyunlarına stavka qoyuram hər həftə gedəndə, o vaxt yaxşı kafsentlə uddum, həmin pulla da aldım maşını”.
Veyis bu söhbəti kənddəkilərə yayandan sonra hamının Fuadgilə münasibəti yaxşılığa doğru dəyişdi. Qumarın hesabına özlərinə gün ağladılar bu şəhərlilər deyən kəndlilər artıq əvvəlki kimi pis baxmırdılar onlara.
İndilərdə də Fuad Samirəyə göz vurur ki, “70 kilo balı satdım optovoylara. Puluna həyətdəki o köhnə tövlənin üstünü bağlamaq istəyirəm. Bulaqda soruşsalar sən də de ki, Fuad yenə futbolda pul udub… Nə bilim əşi, de ki, İngiltərə çempionatına çox vaxt qoyur, arada bəxti gətirir.
P.S. Real hadisələr əsasında yazılıb. Adlar dəyişdirilib, hər hansısa üstə-üstə düşmə tam təsadüfidir.
